کربِ حنانہ- کلیات نعت

مجھ کو بھی کربِ حنانہ ملے لمحہ لمحہ
اُن کا پھر پیار لپیٹے مجھے لمحہ لمحہ

اُس پیمبر کو، جو رحمت کرے لمحہ لمحہ
یاد کرتا ہی رہا بھیج کے لمحہ لمحہ

پھول سب جود و سخا کے کھلے لمحہ لمحہ
نور ہونٹوں پہ چراغاں ہوئے لمحہ لمحہ

رہ گیا اُس درِ اقدس پہ پڑا میرا وجود
کون، کب، لوٹ کے آتے رہے لمحہ لمحہ

دل کی دھڑکن میں رہے یاد کے رقصاں پیکر
رتجگے زینتِ مژگاں ہوئے لمحہ لمحہ

سب مقاماتِ تجلی شب ہجراں یارو
دل کی آنکھوں نے دکھائے مجھے لمحہ لمحہ

روشنی مہک اٹھی شاخوں پہ کونپل کونپل
رنگ نغمات میں ڈھلتے رہے لمحہ لمحہ

منزلِ شوق نے دی آبلہ پائی بیشک
راستے نور کے چلتے رہے لمحہ لمحہ

دامنِ اُحد میں دیکھیں تو ہجومِ عشاّق
قصۂ رزمِ جنوں، سب کہے لمحہ لمحہ

تیغ ایثار سے کٹتے ہیں بتانِ باطن
عمر قرباں مری ہوتی رہے لمحہ لمحہ

روشنی عشقِ محمدؐ کی رگوں میں میری
ایک ندّی رمِ طوفاں رہے لمحہ لمحہ

صبح اُٹھا تو صبا آئی مرے پاس عزیزؔ
کان میں ڈال گئی مصرعۂ لمحہ لمحہ

*