یہ روز و شب کی بیتابی یہ لطفِ جاوداں کیا ہے- زر معتبر (1995)

یہ روز و شب کی بیتابی یہ لطفِ جاوداں کیا ہے
بجز عشقِ نبیؐ میری اِن آنکھوں سے رواں کیا ہے

محیطِ جسم و جاں ہو کر سرِ مژگاں مچلتی ہے
محبت کے سمندر میں یہ موجِ بیکراں کیا ہے

یہ کیسا رتجگا ہے میری غزلوں کے شبستاں میں
مِرے کشکولِ فن میں یہ غبارِ نقدِ جاں کیا ہَے

سِمٹ جاتے نہیں کیوں فاصلے شہرِ محمدؐ کے
میں اکثر سوچتا رہتا ہوں آخر درمیاں کیا ہَے

در و دیوار طیبہ کے مِری آنکھوں میں روشن ہیں
مِری نظروں میں اے پیرِ فلک یہ کہکشاں کیا ہَے

سلامت ہے ابھی تک آشیاں تو ہَے کرم اُنؐ کا
وگرنہ میری ہمت کیا، مِری تاب و تواں کیا ہَے

میسّر ہو جسے اپنے نبیؐ کے نام کی رِم جھم
پھر اُس کے واسطے کالی گھٹا کا سائباں کیا ہے

ہرا رہتا ہے نخلِ آرزو کشتِ دل و جاں میں
نہیں مَیں جانتا بادِ صبا، بادِ خزاں کیا ہَے

کُھلے ہیں اُنؐ کی عظمت کے عَلَم سدرہ سے بھی آگے
زمین و آسماں کیا ہے، مکان و لا مکاں کیا ہے

ریاضؔ اسمِ محمدؐ تو خود اِک نعتِ مسلسل ہے
ترے الفاظ کیا، تیرا قلم، تیری زباں کیا ہے