مخزنِ عِلم و ادب ہیں سب خلیفانِ رسولؐ- تحدیث نعمت (2015)

مخزنِ عِلم و ادب ہیں سب حلیفانِ رسولؐ
مرکزِ انوار و نکہت ہے شبستانِ رسولؐ

منحرف لمحات کے چاکِ گریباں ہوں رفو
اے خدا! مجھ کو مکمل دے تُو ایمانِ رسولؐ

دو جہاں اُنؐ کے نقوشِ پا پہ کرتا ہوں نثار
بحرِ دل میں موجزن ہَے صرف ارمانِ رسولؐ

مَیں بوقتِ عَدل بھی سرکارؐ کے قدموں میں ہوں
اور میری نَسل ہَے مََحشر میں دربانِ رسولؐ

عافیت ہی عافیت ہَے دامنِ سرکارؐ میں
کتنے خوش قسمت ہیں طیبہ کے عزیزانِ رسولؐ

آبجوئے عِلمِ سرکارِ دو عالمؐ ہَے رواں
اَن گِنت ہیں امّتِ سرکش پہ احسانِ رسولؐ

کتنے چہرے ہیں غبارِ شام میں الجھے ہوئے
وادیٔ توصیف میں لیکن ہیں حسّانِؓ رسولؐ

اُس خدائے مہرباں کو کیوں نہ ہم سجدہ کریں
عَدل پر جس نے مقرر کی ہَے میزانِ رسولؐ

خشک سالی نے نمو کی چھین لی ہَے دلکشی
کشتِ جاں پر خوب برسے گی یہ بارانِ رسولؐ

انبیا کو ہَے سرِ مَحشر تلاشِ مصطفیٰؐ
روشنی کا مرکز و محور ہَے ایوانِ رسولؐ

نقرئی سکوّں سے تھا لبریز کشکولِ دعا
پارۂ ناں کو سمجھتے کیا گدایانِ رسولؐ

مکتبِ عشقِ نبیؐ کے لفظ ہیں سب لب کُشا
عِلم و حکمت کا خزانہ ہَے دبستانِ رسولؐ

ہر صدی میں انؐ کی عظمت کے چراغوں کا ظہور
داستانِ عزم و ہمت ہیں رفیقانِ رسولؐ

ان کے جذباتِ محبت کا بیاں ممکن نہیں
جاں نثارانِ پیمبرؐ سب ہیں خاصانِ رسولؐ

روزِ محشر ہو گی اصحابِ پیمبرؐ کی تلاش
صاحبِ تقلید ہوں گے کل بھی یارانِ رسولؐ

آپؐ کے لطف و کرم کا سلسلہ ہے بے کنار
مجھ سا اک مجہول انساں بھی ہَے مہمانِ رسولؐ

آپؐ کے دامن میں کوثر کے چمکتے ہیں چراغ
رحمتِ حق کے ذخائر سب ہیں سامانِ رسولؐ

داخلہ بادِ خزاں کا بند ہے حکماً ریاضؔ
بے نیازِ موسمِ شر ہے گلستانِ رسولؐ

لوگ مَحشر میں بھی ان کے ہاتھ چومیں گے ریاضؔ
محترم ہر بزم میں ہوں گے سخندانِ رسولؐ

اُن کی کِشتِ آرزو میں پھول مہکیں گے ریاضؔ
حشر کے دن سرخرو ہوں گے محبّانِ رسولؐ

یہ تو اذنِ خاص ہَے سرکارؐ کا ورنہ ریاضؔ
کیا کسی شاعر سے ہو گی نعت شایانِ رسولؐ