دو نعتیہ: طیبہ نگر کے سایۂ دیوار میں اتر- کائنات محو درود ہے (2017)

طیبہ نگر کے سایۂ دیوار میں اتر
رم جھم برستے آپؐ کے انوار میں اتر

اُنؐ کے نقوشِ پا سے چراغِ سخن اٹھا
شاہِ عربؐ کے سیرت و کردار میں اتر

گر عافیت کے سبز عمامے کی ہے تلاش
توصیفِ مصطفیؐ کے چمن زار میں اتر

سردارِ کائناتؐ پہ پڑھتے ہوئے درود
نعتِ نبیؐ کی ندرتِ افکار میں اتر

وہؐ خوب جانتے ہیں ہر اک عکس کا مزاج
تو آئنۂ آئنہ بردار میں اتر
ہر لمحۂ حیات کو اک کہکشاں بنا
ہر شب کسی کے عہدِ گہر بار میں اتر

ہر ہر حدیث آپؐ کی ہے خوشبوئے علوم
ہر ہر حدیثِ پاک کے گلزار میں اتر

دوزخ کی سَمت جاتی ہے ہر راہِ انحراف
آقاؐ مرے کی سرمدی اقدار میں اتر

یہ حکم ہے جنابِ رسالت مآبؐ کا
ہر التجائے دخترِ نادار میں اتر

خاکِ رہِ حضورؐ کو سو بار چوم لے
بن کر گلاب کوچہ و بازار میں اتر

مردہ ثقافتوں میں تلاشے گا کیا ریاضؔ
تہذیبِ مصطفیٰؐ کے سمن زار میں اتر

٭٭٭

ہر شب ریاضؔ قریۂ دلدار میں اتر
تُو آبجوئے حسرتِ دیدار میں اتر

ہر ہر ورق پہ ذکرِ نبیؐ کی ہے روشنی
اے بے خبر! تُو آج کے اخبار میں اتر

میلادِ مصطفیٰؐ کی خوشی میں تُو جھوم جا
بچوّں کے ساتھ عید کے تہوار میں اتر

تُو تخت و تاج اپنا سنبھالے گا کب تلک
قسمت کھُلے گی، دامنِ سرکارؐ میں اتر

لکھ بادباں پہ اسمِ گرامی حضورؐ کا
بے خوف ہو کے ہر کسی منجدھار میں اتر

جھلسا گئی ہے عمرِ رواں کی تپش تجھے
شہرِ خنک کے حجلۂ غم خوار میں اتر

اُنؐ کے کرم کی ساری کھجوریں سمیٹ لے
خلدِ زمیں کے رس بھرے اثمار میں اتر

ہر اشک میں ہے گنبدِ سرکارؐ جلوہ گر
شہرِ قلم کے دیدۂ بیدار میں اتر

حرفِ اذاں ہو تیری سماعت کی آبرو
سجدے گذار، عشق کے مینار میں اتر

ہر لمحۂ حیات کو اک کہکشاں بنا
ہر خواب میں تو عہدِ گہر بار میں اتر

آنسو ندامتوں کے بدن پر سجا کے چل
ممکن اگر ہو چشمِ گنہ گار میں اتر

پھولوں کے رتجگوں میں بسر عمر کر تمام
کلکِ ریاضؔ گلشنِ بے خار میں اتر