مرے گھر میں ہمیشہ خلدِ طیبہ کی ہوا اترے- آبروئے ما (2014)

مرے گھر میں ہمیشہ خلدِ طیبہ کی ہوا اترے
سرِ شاخِ قلم بھی موسمِ صلِّ علیٰ اترے

مَیں ہر مصرع کے سر پر تاج رکھوں خاکِ انور کا
چمن زارِ غزل میں پھر پر و بالِ ہما اترے

مجھے بھی نعت گوئی کا سلیقہ دے مرے مولا!
مرے بھی کاسۂ فن میں زرِ ارض و سما اترے

قلم سرکارؐ کے در پر مچلنے کی ادا سیکھے
مرے اسلوبِ دلکش میں سدا حرفِ ثنا اترے

کئی برسوں سے پیاسی ہے مرے آنگن کی ہر تتلی
مری کشتِ ادب میں عشق کی کالی گھٹا اترے

سلامت رکھ مرے ایمان کی کشتی کو تُو، یارب!
قیامت تک مرے سر سے نہ قرضِ ناخدا، اترے

ہمیشہ عجز کی بارش مری بنجر زمینوں پر
مرے سر سے، مرے آقاؐ، کبھی جھوٹی انا اترے

سوا نیزے پہ سورج ہے بلائے ناگہانی کا
برہنہ سر پہ شفقت کی مرے آقاؐ ردا اترے

محمدؐ کے غلاموں کے غلاموں کی غلامی میں
کتابِ دیدہ و دل میں چراغِ نقشِ پا اترے

چراغاں ہی چراغاں ہو، چراغاں ہی چراغاں ہو
لحد میں محفلِ میلاد کی یارب! فضا اترے

درِ سرکارؐ سے آئے بلاوا خوش نصیبوں کو
جوارِ گنبدِ خضرا میں میری التجا اترے

نبی جیؐ، آپؐ کا شاعر اذیّت کے بھنور میں ہے
کبھی خالی کٹوروں میں خنک آبِ شفا اترے

تباہی کے دہانے پر کھڑے ہیں رہنما میرے
وطن میں دائمی امن و اماں کا قافلہ اترے

لہو مَیں چاٹتا رہتا ہوں اپنی بد نصیبی کا
سکونِ قلب کا میری زباں پر ذائقہ اترے

نبی جیؐ، دخترِ حوا کے سر پر چادرِ رحمت
کسی مفلس کی بیٹی کی ہتھیلی پر حنا اترے

نبی جیؐ، ارضِ پاکستان کے گوٹھوں‘ گراؤں میں
فراوانی ہو رحمت کی‘ کرم کی انتہا اترے

سپاہِ ارضِ کوفہ پر بھروسہ کیا کرے کوئی
کبھی قاتل کے آنگن میں بھی شامِ کربلا اترے

شرف انسان کا بکھرا ہوا ہے تنگ گلیوں میں
شبِ تہذیبِ نو کے واسطے بھی ضابطہ اترے

مجھے پاکیزہ لفظوں کے خزانوں کا تُو کر مالک
قلم کی راجدھانی سے غبارِ ناروا اترے

مناظر اس نے عبرتناک دیکھے ہیں سرِ مقتل
قلم میرا درِ سرکارؐ پر روتا ہوا اترے

کسی دن پھر صبا انگلی پکڑ کر مجھ کو لے جائے
فضائے شہرِ طیبہ میں ریاضِ بے نوا اترے