تو ہی پیغمبرِ ارض و سما ہے یا رسول اللہ- زر معتبر (1995)

تو ہی پیغمبرِ ارض وسما ہے یارُسولؐ اللہ
تو ہی سُلطانِ ملکِ انبیأ ہے یارُسولؐ اللہ

دریچے کُھل گئے ہیں ذہن کی تاریک گلیوں میں
بلندی پر مرا بختِ رسا ہَے یارُسولؐ اللہ

اِسے میں قبلہ و کعبہ نہ لکھّوں پھر تو کیا لکھّوں
حریمِ دل میں تیرؐا نقش پا ہَے یارُسولؐ اللہ

ازل سے تا ابد پرچم صداقت کا ترؐا پرچم
تریؐ کملی کا دامن پَر کشا ہے یارُسولؐ اللہ

مَیں زنجیرِ غلامی ہی خریدوں گا مدینے میں
زرِ شہرِ محبت مل گیا ہے یارُسولؐ اللہ

فقیرِ کج کلہ کہتی ہے جس کو طنز سے دُنیا
غم و آلام میں وہ مُبتلا ہَے یارُسولؐ اللہ

خوشامد کیوں کریں دُنیا کے جُھوٹے بادشاہوں کی
تریؐ چوکھٹ کا جن کو آسرا ہے یارُسولؐ اللہ

حروفِ نُور پر پہرے بٹھاتے ہیں خرد والے
غبارِ وادیٔ ظلمت اُٹھا ہَے یارُسولؐ اللہ

نہ کوئی پاس ہے محراب و منبر کے تقدّس کا
بہت ارزاں یہاں نامِ خُدا ہے یارُسولؐ اللہ

ابھی جمہُور کا دامن تہی ہے لالہ و گل سے
ملوکیت کے ہاتھوں میں قبا ہے یارُسولؐ اللہ

دھنک کے جتنے بھی منظر تھے وہ تو ہوچکے رخصت
یہ چشمِ تر میں کیسا رتجگا ہَے یارُسولؐ اللہ

غلاموں نے غبارِ شب کے ہاتھوں پر سرِ متقل
چراغِ آرزو بھی رکھ دیا ہے یارُسولؐ اللہ

ستم سہہ کر بھی چُپ رہتے ہیں خیبر توڑنے والے
یہ اپنی بے بسی کی انتہا ہے یارُسولؐ اللہ

صدف چہروں پہ لکھّی جارہی ہے داستاں غم کی
قلم ہاتھوں میں آ کر کانپتا ہے یارُسولؐ اللہ

ضمیرِ آدمِ خاکی کو مٹی کھا چکی کب کی
مسلط فکرِ مغرب پر قضا ہے یارُسولؐ اللہ

ریاضِؔ بے نوا کی بھی ذرا فریاد سُن لیجے
پسِ دربار مصروفِ دُعا ہے یارُسولؐ اللہ