مہمانِ کربلا- شعورِ کربلا (2018)

صبر و رضا کے پھول ہیں عنوانِ کربلا
اشکوں سے تر ہوا ہے گریبانِ کربلا

ہے حریت کے سر کا عمامہ حسینیت
عظمت کا ہے نصاب قلمدانِ کربلا

قصرِ ان کے سامنے دیوار پر لکھو
بنیادِ نظمِ عدل ہے میزانِ کربلا

تاریخِ انقلاب کی ہے کون آبرو
مہمانِ کربلا فقط مہمانِ کربلا

خیمے ہیں یا گلاب کے پھولوں کی پتیاں
خوشبو سے بھر گیا ہے بیابانِ کربلا

چہروں پہ ہے علی کی شجاعت کا بانکپن
شاہد ہے جاں نثاری کا میدانِ کربلا
سادات کے ہے چاند ستاروں کی کہکشاں
سج دھج رہا ہے آج شنستانِ کربلا

انسان کے ضمیر میں زندہ ہیں آج بھی
معصومِ تشنہ لب وہ شہیدانِ کربلا

خوشبو چراغ لے کے کہاں ڈھونڈنے چلی
نیزے کی نوک پر ہے گلستانِ کربلا

آقائے کائنات ﷺ کے ہاتھوں کو چوم کر
ْرآن پڑھ رہا ہے دبستانِ کربلا

پوچھو خدا کے واسطے ابنِ زیاد سے
ابنِ علی کا خون ہے تاوانِ کربلا؟

تہذیبِ عصر اِس کا بھی کوئی جواب ہے
کس کے لہو سے سرخ ہے دامانِ کربلا

آنکھو! بڑے ادب سے بچھو گرم ریت پر
دیکھو برہنہ پا ہیں اسیرانِ کربلا

میری زمیں پہ حشر یہ برپا ہوا ہے کیا
لوگو! خطا ہیں آج بھی اوسانِ کربلا

وابستگی کے نور میں ہر ایک ہے جبیں
افراد محترم ہیں عزیزانِ کربلا

پرچم حسینیت کا اڑے گا افق افق
اک رہنما اصول ہے فرمانِ کربلا

کرب و بلا کی ریت پر میرا قلم لکھے
لشکر یزیدیوں کا ہے سرطانِ کربلا

سوچو، ازل سے کس کے ہے دامن میں روشنی
سوچو، ہے کون بے سر و سامانِ کربلا

میں جانتا ہوں عزم و شجاعت کی ہر گھڑی
رکھے گی یاد حشر تک احسانِ کربلا

مہمانِ کربلا سے طلب حوصلہ کریں
سر پر کھڑی ہے شامِ غریبانِ کربلا
اسلام کے خلاف جو سازش میں ہیں شریک
دراصل آج کے ہیں یزیدانِ کربلا

ثابت کیا ہے گردشِ لیل و نہار نے
جھومر ہے کائنات کا سلطانِ کربلا

مَیں کیا، غریبِ شہرِ قلم، مرثیہ لکھوں
میر و دبیر، دونوں ہیں حسّانِ کربلا

آؤ خدائے علم سے مل کر دعا کریں
ہر شخص کو نصیب ہو عرفانِ کربلا

اللہ کا در ہی منزلِ مقصود ہے ریاضؔ
اللہ کی ہے ذات نگہبانِ کربلا

٭

اے روحِ انقلابِ دل و جاں سلام ہو
اے پاسبانِ عظمتِ انساں سلام ہو