لوح و قلم کا سوئے حرم کارواں چلے- نصابِ غلامی (2019)

لوح و قلم کا سوئے حرم کارواں چلے
مشتِ غبار بن کے دلِ ناتواں چلے

جبریل تھام لے مرے دستِ شعور کو
عشقِ نبی ﷺ میں ڈوب کے کلکِ رواں چلے

اشکوں کے شاخِ دل پہ سجاتا چلوں گلاب
اقلیمِ نعت میں یہ زرِ جاوداں چلے

مہکے مری لحد بھی درود و سلام سے
بعد از حیات ذکرِ شہ مرسلاں ﷺ چلے

ہر ساعتِ عزیز جلے بن کے آرزو
طیبہ کی وادیوں میں جگر کا دھواں چلے

سجدے قدم قدم پہ گذارے مری غزل
بختِ رسا ریاضؔ سرِ کہکشاں چلے