درِ عطا پہ کھڑا ہوں، عطا کریں گے حضور ﷺ- نصابِ غلامی (2019)

درِ عطا پہ کھڑا ہوں، عطا کریں گے حضور ﷺ
قبول آج بھی حرفِ ثنا کریں گے حضور ﷺ

سخن کے سارے نوادر سے جھولیاں بھر کر
غریبِ شہرِ قلم کا بھلا کریں گے حضور ﷺ

ازل سے پھول سے لمحوں کا منتظر ہوں مَیں
حصارِ غم سے مجھے بھی رہا کریں گے حضور ﷺ

قیامِ حشر تلک شہرِ نور و نکہت میں
غلام آپ ﷺ کے آ کر بُکا کریں گے حضور ﷺ

فقیر آپ کی چوکھٹ کے بعدِ محشر بھی
متاعِ دیدۂ پُرنم فدا کریں گے حضور ﷺ

خدا کے ماننے والے خدا کی بستی میں
نمازِ عشق و محبت ادا کریں گے حضور ﷺ

مجھے یقیں ہے کہ نیلی ہوا کے آنچل پر
چراغ، اسمِ گرامی لکھا کریں گے حضور ﷺ

یزیدِ وقت کے دربارِ فتنہ و شر میں
اسیرِ جاہ و حشم ہی جھکا کریں گے حضور ﷺ

ہوا و رزق پہ قابض ہیں اہلِ شر کب سے
مرے لئے بھی مسلسل دعا کریں گے حضور ﷺ

انہیں پکار کے دیکھے کبھی شبِ گریہ
ہوائے تُند کو دستِ صبا کریں گے حضور ﷺ

بنوں گا مرکزِ چشمِ جہاں سرِ محفل
کرم کی دیکھنا پھر انتہا کریں گے حضور ﷺ

لحد کے گھور اندھیروں میں بھی دمِ پرسش
کرم، ریاضؔ پہ بہرِ خدا کریں گے حضور ﷺ