غریبِ شہرِ سخن کا سلام ہو آقاؐ- دبستان نو (2016)

سلام ارض و سما کے ہر ایک ذرّے کا
سلام میرے قلم کے سجودِ مدحت کا
سلام چشمِ محبت کے آبگینوں کا
سلام نطق و بیاں کی نیاز مندی کا
سلام میرے وطن کی ہوائے پرنم کا
سلام تشنہ دہاں میری آبشاروں کا
سلام وادیٔ بطحا کے مرغزاروں کا
سلام جلتے ہوئے میرے برف زاروں کا
سلام شہرِ اخوّت کے لالہ زاروں کا
سلام سرورِ کونینؐ! ہم غلاموں کا
سلام میری زباں کے کلام تازہ کا
سلام میرے تخیل کی روشنی کا سلام
سلام آج کے اخبارِ لب کُشا کا سلام
سلام شہرِ مدینہ کے رتجگوں کو سلام
سلام گلشنِ سرکارؐ کی بہاروں کو
غریبِ شہرِ سخن کا سلام ہو آقاؐ
سلام آپؐ پر لاکھوں سلام ہوں آقاؐ
سلام حور و ملک کا سلام ہو آقاؐ
خلا کی وسعتیں آقاؐ درود پڑھتی ہیں
مرے قلم سے ہمیشہ کلام کرتی ہیں

فلک کے چاند ستارے سلام کرتے ہیں
دل و نظر بھی ہمارے سلام کرتے ہیں