سجدہ گاہِ حروفِ دعا ہَے ورق- زم زم عشق (2015)

سجدہ گاہِ حروفِ دعا ہے ورق
گویا اک دامنِ التجا ہے ورق

آبِ رحمت میں لب اس کے ڈوبے ہوئے
سر بہ سر مدحتِ مصطفیٰ ؐ ہے ورق

پھول لے کر فرشتے اترتے رہے
نعتِ سرکار ؐ کی ابتدا ہے ورق

میرے باہر ہی شاداب موسم نہیں
میرے اندر بھی سرسبز سا ہے ورق

پوچھ لوں گا مَیں خلدِ نبی ؐ سے کبھی
چاند، خوشبو دھنک یا صبا ہے ورق؟

شکر واجب ہَے مجھ پر بھی رحمان کا
محفلِ نعت میں لب کشا ہے ورق

اس کے ماتھے پہ اسمِ نبی ؐ لکھ دیا
مرسلِ ؐ مرسلاں کی ثنا ہے ورق

اُن ؐ کے فرماں سے غافل ہوا آدمی
پوری تہذیب پر تبصرہ ہے ورق

بھیگتا ہَے درودوں کی برسات میں
نور و نکہت کا اک سلسلہ ہَے ورق

چوم لوں اس کے ہر حرف کو چوم لوں
خاکِ طیبہ سے بھی آشنا ہے ورق

اس پہ توصیفِ خیرالبشر ؐ ہے رقم
مظہرِ شانِ خیرالوریٰ ہے ورق

اس پہ نازل ہوئی ہَے کتابِ ثنا
عشقِ سرکار ؐ کی انتہا ہَے ورق

میرے سارے مسائل ہیں لکھّے ہوئے
اُن ؐ کے در پر مری التجا ہے ورق

کل بھی رحمت کا جادہ تھا اس کا لقب
آج بھی بابِ لطف و عطا ہے ورق

اک سمندر مضامینِ نو کا ہے یہ
میری کشتی کا بھی ناخدا ہے ورق

خونِ ناحق ریاضؔ آج ہے رَقص میں
عہدِ حاضر کی اک کربلا ہے ورق