حمد- زر معتبر (1995)

لذتِ غم کو محیطِ داستاں کِس نے کیا

دل کی ہر دھڑکن کو پابندِ فغاں کِس نے کیا

کِس نے مُجھ کو بخش دی لوح و قلم کی مملکت

آب و گِل کی کشمکش کا ترجماں کِس نے کیا

کِس کے اذنِ عام سے سرگوشیاں کرتا ہے دل

منحرف چہروں کا اِس کو رازداں کِس نے کیا

اِن ہواؤں کو دیا کِس نے تغیر کا نصاب

آبشاروں کو پہاڑوں سے رواں کِس نے کیا

ہر کلی کے دامنِ صَد چاک میں رکھ کر گلاب

ہر برہنہ شاخ کو رشکِ جناں کِس نے کیا

سوچتا ہوں بیٹھ کر یہ شام کی دھلیز پر

جھاڑیوں میں جگنوؤں کو پرفشاں کِس نے کیا

نام کِس کا ہے جزیروں کی سحر کے وردِ لب

پھر ہوا کو کشتیوں کا بادباں کِس نے کیا

خوشبوؤں کو کِس نے بخشا ہے تکلم کا ہُنر

تِتلیوں کو مُلکِ گُل کا حکمراں کِس نے کیا

کِس تسلُسل سے اُجالا ہو رہا ہے اِن دنوں

میرے گھر کے بام و در کو زرفشاں کِس نے کیا

آخرِ شب کون سُلجھاتا ہے میری اُلجھنیں

ماسوا اُس کے علاجِ دردِ جاں کِس نے کیا

کِس نے لکھی ہے درودوں سے کتابِ ارتقاء

حور و غلماں کو بھی اپنا ہمزباں کِس نے کیا

کِس نے توصیفِ پیمبرؐ کا کیا منصب عطا

مُجھ کو مداحِ شہِ کون و مکاں کِس نے کیا

کس نے مدحت کے چراغوں کو شعاعِ نُور دی

ایک شاعر کو حریفِ کہکشاں کِس نے کیا

تابشِ نعتِ نبیؐ کو کِس نے بخشا ہے دوام

میرے فن کی چاندنی کو جادواں کس نے کیا

ہر قدم پر منزلوں نے نقشِ پا چومے ریاضؔ

اپنی رحمت کو شریکِ کارواں کس نے کیا