اہتمام- زر معتبر (1995)

اہتمام

زباں آبِ زر سے وضو کر کے آئے
لغت کورے کاغذ پہ آنکھیں بچھائے

پسِ حرف جذبوں کی مشعل جلائے
تغزل جبینِ سخن کو سجائے

مرا نطق سجدوں پہ سجدے بسائے
بساطِ ادب پر بیاں سر جھکائے

اُفق دَر اُفق روشنی جگمگائے
سحابِ نظر چاندنی میں نہائے

دھنک سات رنگوں کی رم جھم اُٹھائے
مِرے دامنِ شعر میں جھلملائے

فلک عشق و مستی کے ساغر لنڈھائے
قدم چڑھتے سُورج کا بھی ڈگمگائے

سحر نُورِ وحدت کے موتی لُٹائے
لچک کر گُلِ سبز خوشبو بسائے

سرِ شاخِ طُوبیٰ کرن جگمگائے
گلِ نودمیدہ ذرا مسکرائے

بہارِ چمن تِتلیوں کو جگائے
پرندوں کو بادِ سحر گُدگدائے

شرابِ محبت کی مستی چرائے
روش در روش موتیا لہلہائے

ہوا زیرِ لب سرمدی گیت گائے
گھٹا رقص کرتے ہوئے گنگنائے

صبا خاکِ طیبہ کی سوغات لائے
دیارِ عقیدت کی باتیں بتائے

قصیدہ جمالِ نبیؐ کا سنائے
غزل مجھ پہ احسان اپنے جتائے

سخنور فصاحت کے دریا بہائے
سرِ عرش جبریل مصرع اُٹھائے

مَیں توصیفِ ختم الرسل لکھ رہا ہوں
قلم اِس سعادت پہ خوشیاں منائے

مگر گردشِ وقت سے التجا ہے
کہ امشب جہاں ہے وہیں ٹھہر جائے

خُدا کو میں نعتِ نبی تو سُنا لو
حجابات کے سارے پردے ہٹا دوں