تسبیحِ غم میں سلکِ فروزاں ہوں یا رسولؐ- رزق ثنا (1999)

تسبیحِ غم میں سلکِ فروزاں ہوں یارسولؐ
مانندِ تارِ چاکِ گریباں ہوں یارسولؐ

اب کربلائے عصر میں خیمے بھی جل چکے
صحرائے شب میں بے سرو ساماں ہوں یارسولؐ

دیوارِ جاں پہ خوفِ مسلسل کا ہوں ہدف
سوزِ چراغِ شامِ غریباں ہوں یارسولؐ

کب سے حریمِ دل کے کھنڈر میں ہوں یا نبیؐ
کب سے پسِ غبارِ گلستاں ہوں یارسولؐ

کوفے کے ساتھیوں کا بھروسہ نہیں کوئی
شہرِ نجف میں کب سے پریشاں ہوں یارسولؐ

اسرارِ ریگِ کربِ مسلسل کے دشت میں
پروازِ پر شکستہ کا عنواں ہوں یارسولؐ

اب تک جہالتوں کے علَم ہیں مری شناخت
کہنے کو عہدِ نو کا مَیں انساں ہوں یارسولؐ

کوہِ ندا پہ کوئی تجلی گرے کہ مَیں
کب سے حریفِ سروِ چراغاں ہوں یارسولؐ

شہرِ ہنر میں کوہکنی کا شرف ملے
برگِ ہوائے گردشِ دوراں ہوں یارسولؐ

اذنِ قیام مجھ کو بھی قدموں میں دیجئے
مشتِ غبارِ دشت و بیاباں ہوں یارسولؐ

امیدوارِ بخشش و عفو و کرم ہوں مَیں
اپنی ہر اک خطا پہ پشیماں ہوں یارسولؐ

میری ندامتوں کی گواہی قلم سے لیں
اوراقِ شب پہ حرفِ گریزاں ہوں یارسولؐ

کیا آسمان سر پہ تجلی کی دے ردا
اپنی زمیں سے دست و گریباں ہوں یارسولؐ

میری طرف بھی چادرِ رحمت اچھال دیں
ادنیٰ سا ایک میں بھی ثنا خواں ہوں یارسولؐ

جو بھی ملا حضورؐ مجھے بے طلب ملا
اتنی نوازشات پہ حیراں ہوں یارسولؐ

ہاں میں ریاضؔ جس کو غلامی پہ ناز ہے
طیبہ میں آج آپؐ کا مہماں ہوں یارسولؐ