ماں باپ میرے آپ ﷺ پر قربان یا نبی ﷺ- مطاف نعت (2013)

ماں باپ میرے آپ ﷺ پر قربان یا نبی ﷺ
ہیں آپ ﷺ ہی تو میرے نگہبان یا نبی ﷺ

کوئی نہیں جہاں میں مرا آپ ﷺ کے سوا
ہو جائیں ساری مشکلیں آسان یا نبی ﷺ

لاکھوں درود آپ پر لاکھوں سلام ہوں
رکھتا ہوں زادِ رہ یہی سامان یا نبی ﷺ

ناحق ہے اکلِ مال کی پھیلی ہوئی وباء
تیغِ دو دم رہے مرا ایمان یا نبی ﷺ

الحاد و شرک پھر نئی صف بندیوں میں ہیں
بے کس ہے بے نوا ہے مسلمان یا نبی ﷺ
مسکیں سے مہربان نے توڑا ہے رابطہ
ہے ورد راجعون کا فرمان یا نبی ﷺ

یہ ڈر کہ روک لیں گے درِ مصطفیٰ ﷺ سے لوگ
کرتا بہت ہے مجھ کو پریشان یا نبی ﷺ

چھوٹے نہ مجھ سے حق و صداقت کا راستہ
رہتا ہے دل میں آپ ﷺ ہی کا دھیان یا نبی ﷺ

دنیا کی منفعت سے کوئی واسطہ نہیں
راضی ہوں آپ ﷺ اور مرا رحمٰن یا نبی ﷺ

گریہ کناں ہے دامنِ قرطاس پہ قلم
مصلوب ہو گیا ہے کوئی بیان یا نبی ﷺ

بھرتا نہیں ہے جی مرا باتوں کے ڈھیر سے
کرنے کو سر ہوں معرکۂ جان یا نبی ﷺ

میں کربلا کی یاد میں رہتا ہوں ہر گھڑی
کر دوں گا جان اپنی مَیں قربان یا نبی ﷺ
مولا ﷺ ! مجھے بلا لیں اب قدمینِ پاک میں
ہے التجا وسیلۂ حساّنؓ یا نبی ﷺ

دیکھیں گے در پہ جس گھڑی نادم غلام کو
بخشیں گے حرفِ توبہ کا عرفان یا نبی ﷺ

یہ آرزو ہے ایسا کوئی خواب دیکھ لوں
رہتے ہیں کیسے آپ ﷺ کے مہمان یا نبی ﷺ

اِن موسموں کے حبس سے شکوہ نہیں کوئی
حرفِ ثنا ہے آپ ﷺ کا احسان یا نبی ﷺ

آتی ہے اس سے جنت الفردوس کی ہوا
دائم رہے یہ نعت کا میلان یا نبی ﷺ

ترمیمِ حرف ہو نہیں سکتی عزیزؔ سے
کلمے کا شہد پیتا ہوں ہر آن یا نبی ﷺ