التماس- خلد سخن (2009)

یانبیؐ، میرِ اممؐ نظرِ کرم
یارسولِ محتشمؐ، نظرِ کرم

مٹ گیا ہے منزلوں کا ہر نشاں
راہ سے بھٹکا ہوا ہے کارواں
منجمد آنکھوں میں ہے شب کا دُھواں
قہر بن کر ٹوٹتا ہے آسماں
اے شہِ عرب و عجمؐ، نظرِ کرم

یانبیؐ، میرِ اممؐ نظرِ کرم
یارسولِ محتشمؐ، نظرِ کرم

طاق میں رکھا ہوا قرآن ہے
بے عمل اس دور کا انسان ہے
عشق کی ہر رہگذر ویران ہے
علم کا ہر آئنہ حیران ہے
تابشِ لوح و قلم، نظرِ کرم

یانبیؐ، میرِ اممؐ نظرِ کرم
یارسولِ محتشمؐ، نظرِ کرم

سانحے غم کے بڑے ہیں یا نبیؐ
تیر سینے میں گڑے ہیں یا نبیؐ
روسیہ در پر کھڑے ہیں یا نبیؐ
کب سے چوکھٹ پر پڑے ہیں یا نبیؐ
پیکرِ عفو و کرم، نظرِ کرم

یانبیؐ، میرِ اممؐ نظرِ کرم
یارسولِ محتشمؐ، نظرِ کرم

دست بستہ ہیں غلاموں کے ہجوم
اب ملے گردِ کفِ حسنِ قدوم
سر جھُکاتے ہیں یہاں ماہ و نجوم
اور ہیں کاسہ بکف سارے علوم
یاحبیبِ محترم! نظرِ کرم

یانبیؐ، میرِ اممؐ نظرِ کرم
یارسولِ محتشمؐ، نظرِ کرم