شہرِ قلم میں گونجتا حرفِ اذاں رہے- کائنات محو درود ہے (2017)

شہرِ قلم میں گونجتا حرفِ اذاں رہے
سر پر مرے حضورؐ ہی کا سائباں رہے

خاکِ در حضورؐ میں ڈھونڈو بصد ادب
تم پوچھتے ہو چاند ستارے کہاں رہے

انسان برف زاروں میں رہنے پہ ہے بضد
اُنؐ کے کرم کی دھوپ کراں تا کراں رہے

روزِ ازل سے حکم ہے پروردگار کا
راہِ نبیؐ میں پھول، دھنک، کہکشاں رہے

شہرِ نبیؐ میں اڑتا رہے طائرِ خیال
کیفِ دوام میں مرا نطق و بیاں رہے

بستی کے ارد گرد ہے تاریکیوں کا راج
ہر ہر بیاضِ نعت مری ضو فشاں رہے

میری یہ التماس ہے، یارب بروزِ حشر
مصروف نعت گوئی میں میری زباں رہے

آنکھوں کو بس نقوشِ کفِ پا کی ہے تلاش
طیبہ کی سمت قافلہ میرا رواں رہے

کتنی عجیب میری تمنا ہے یہ ریاضؔ
ہر ہر صدی میں میرا قلم زر فشاں رہے