اُگے فصلِ قلم کشتِ ثنا میں یا رسول اللہ ﷺ- خلد سخن (2009)

اُگے فصلِ قلم کشتِ ثنا میں، یارسول اﷲ
گدازِ عشق ہو حرفِ دعا میں، یارسول اﷲ

سوائے آپؐ کے کوئی نہیں رحمت لقب آقاؐ
کوئی ثانی نہیں ارض و سما میں، یارسول اﷲ

بجھے آنگن میں اترے کہکشاں امشب دبے پاؤں
جلے قندیل طاقِ التجا میں، یارسول اﷲ

شرف بخشیں حضوری کا کسی دن جاں نثاروں کو
ہمارے اشک ہیں دستِ صبا میں، یارسول اﷲ

ملے شاداب موسم آرزو کے مرغزاروں میں
وہی موسم جو مہکا تھا حرا میں، یارسول اﷲ

ضمیر اولادِ آدم کا یقینا ہو چکا مردہ
گرے آنسو کوئی خوفِ خدا میں، یارسول اﷲ

حصارِ خوف میں ہیں اُمتِ مظلوم کے خطّے
پرندے شب کے اُڑتے ہیں فضا میں، یارسول اﷲ

لبوں پہ خوش کلامی کی دھنک اُترے تو کیا اُترے
ابھی بارود کی بو ہے ہوا میں، یارسول اﷲ

کھُلی آب و ہوا میں سانس لینے پر ہے پابندی
رگِ جاں ہے گرفتِ ناروا میں، یارسول اﷲ

ہجومِ لالہ و گل پر گریں گی بجلیاں کب تک
چمن ہے آج بھی دامِ قضا میں، یارسول اﷲ

نہیں کھُلتا کوئی در شہر میں میری صداؤں پر
اثر دیجے نوائے بے نوا میں، یارسول اﷲ

ریاضِؔ بے نوا تنہا کھڑا ہے ریگ زاروں میں
چھپا لیں اس کو دامانِ عطا میں، یارسول اﷲ