السلام اے حریت کے قافلوں کے رہنما- شعورِ کربلا (2018)

السلام اے حریت کے قافلوں کے رھنما
السلام اے صاحب لولاک کے نورِ نظر
السلام اے پاسبانِ عظمتِ خیرالبشر ﷺ

السلام اے دشتِ کربل میں صداقت کی اذاں
السلام اے جنبشِ لب پر سسکتی داستاں

السلام اے گلشنِ خیر الواریٰ کے عندلیب
السلام اے شہرِ گل میں فصلِ تازہ کے نقیب

السلام اے حریت کے قافلوں کے رھنما
السلام اے صبحِ آزادی کے ہونٹوں کی دعا

السلام اے سرحدِ افلاک پر خوں کے سحاب
السلام اے مقتلِ شب کی سیاہی کے جواب

السلام اے ظلمتِ شب میں اجالوں کی دلیل
السلام اے وادیٔ انوار کی صبح، جمیل
السلام اے کشتۂ تیغِ جفا، تیغِ ستم
السلام اے سرمدی لمحوں کے لہراتے علَم

السلام اے بے کفن لاشوں کی حرمت کے امیں
السلام اے دیدۂ پُرنم کے نقشِ اولیں

السلام اے دینِ ختم المرسلیں کی آبرو
السلام اے تاقیامت منزلوں کی آبرو

السلام اے کرب کے اوراق کی تشنہ کتاب
السلام اے اشکِ خوں کے نام لکھے انتساب

السلام اے مصحفِ اوصاف کی پاکیزگی
السلام اے دانش و برہان کی تابندگی

السلام اے فاطمہؓ کے لال اے ابنِ علیؓ
السلام اے اُمّتِ مرحومہ کی تشنہ لبی

حشر تک تیرا کرے گی نسلِ آدم احترام
اے حسینؓ ابن علیؓ ہو ایک شاعر کا سلام