چشمِ تر کی التجاؤں کے کفیل- اکائی (2018)

اے کہ
ارضِ التجا پر بے نواؤں کے رسول ﷺ
اے کہ
خاکِ پاک میں لاکھوں کروڑوں ماہتاب
اے کہ
عرفاتِ سخن میں روشنی ہی روشنی
اے کہ
اربابِ دعا کی ہر دعا کے سائباں
اے کہ
تابندہ سحر کے رنگ و بو کی آبرو
اے کہ
صحنِ گلستانِ آرزو کی دلکشی
اے کہ
تقویٰ اور توکل کی بہار جاوداں
اے کہ
افکارِ پریشاں میں ثباتِ زندگی
اے کہ
دستارِ فضیلت آپ ﷺ کے نقشِ قدم
اے کہ
نسلِ آدمِ خاکی کی عظمت کی دلیل
اے کہ
ہر مخلوق کے افضل تریں، خیرالبشر ﷺ
اے کہ
دامانِ حرا میں بندگی کی انتہا
اے کہ
صبحِ ارضِ جاں کی خوشبوئے لطف و کرم
اے کہ
پہلی روشنی کی آخری روشن کتاب
اے کہ
سدرہ سے بھی آگے کی بلندی کے سفیر
اے کہ
تاج و تختِ شاہی آپ ﷺ کے قدموں کی دھول
اے کہ
بارانِ کرم ہے چشمِ رحمت کی عطا
اے کہ
ادوارِ گزشتہ کے رسولوں کے امام
اے کہ
محشر تک قیادت آپ ﷺ ہی کے نام ہے
اے کہ
میرے دیدہ و دل کے مکینِ محتشم ﷺ
اے کہ
دستِ آرزو میں روشنی کے آفتاب
اے کہ
حرفِ عدل کی زندہ روایت کے امیں
اے کہ
میری سب دعاؤں کا وسیلہ آپ ﷺ ہیں
اے کہ
اقلیمِ محبت کے ازل سے حکمراں
اے کہ
محشر میں شفاعت کے علَم بردار آپ ﷺ
اے کہ
مجھ کو آپ ﷺ کے دامانِ رحمت کی طلب
اے کہ
میری چشمِ تر کی التجاؤں کے کفیل
اے کہ
سرکارِ مدینہ آپ ﷺ پر لاکھوں درود
اے کہ
محبوبِ خدا ہیں آپ پر لاکھوں سلام