سلام! تاجِ نبوت کے گوھر یکتا- نصابِ غلامی (2019)

سلام
تاجِ نبوت کے گوھر یکتا
سلام
صاحبِ لولاک ﷺ ، صاحبِ معراج
سلام
بزمِ رسالت کے آخری مرسل ﷺ
سلام
نورِ ہدایت کے آخری مخزن
سلام
بابِ اخوت کی آخری سطریں
سلام
حکمت و دانش کے آخری سورج
سلام
شامِ محبت کی آخری قندیل
سلام
آدم و حوّا کی آخری امید
سلام
ارضِ تمنا کے بادشاہِ عظیم
سلام
اوّلیں تخلیقِ قادرِ مطلق
سلام
رحمتِ عالم، سلام میرِ امم ﷺ
سلام
مخبرِ صادق، امین، نورِ ازل
سلام
ندرتِ افکار کا جلال و جمال
سلام
محسنِ اعظم، سلام دل کے مکیں
سلام
آپ ﷺ پر آقا ﷺ ، درود لاکھوں ہزار
سلام
ارض و سما کے چراغِ تابندہ
سلام
عرش کے مہمانِ محترم کو سلام
سلام
علم کے شہرِ قدیم میرا سلام
سلام
آپ ﷺ پہ محبوبِ کبریا ہو سلام
سلام
نقشِ کفِ پائے مصطفیٰ ﷺ کو سلام
سلام
میرے مقدر کی رفعتوں کو سلام
سلام
آپ ﷺ کے ہر معجزے کو میرا سلام
سلام
آپ ﷺ کے روضے کی جالیوں کو سلام
سلام
گنبدِ خضرا کی نکہتوں کو سلام
سلام
شہرِ اخوت کی ساعتوں کو سلام
سلام
شہرِ معنبر کے آسماں کو سلام
سلام
آپ ﷺ کے اصحابِ محترم کو سلام
سلام
آپ ﷺ کے ہر جاں نثار کو ہو سلام
سلام
حضرتِ عثمان کی حیا کو سلام
سلام
سارے شہیدانِ محترم کو سلام
سلام
آپ ﷺ کے مدحت نگار کو ہو سلام
سلام
مکتبِ حکمت میں آگہی کی سبیل
سلام
علمِ شریعت کی ثروتِ بے حد
سلام
عدل و مساوات کے علم بردار
سلام
خالق و مالک کے برگزیدہ رسول ﷺ
سلام
دانش و برہاں کے آفتابِ قدیم
سلام
وادیٔ جنت کے موسموں کے سفیر
سلام
دودھ کی نہروں کے مالک و مختار
سلام
عدل و مساوات کی متاعِ عزیز
سلام
مفلس و نادار کے کفیلِ عظیم
سلام
بخشش و رحمت کے داعیِ برحق
سلام
قائدِ ارض و سما و جن و بشر
سلام
میرے تخیل سے ماورا آقا ﷺ
سلام
دامنِ لوح و قلم کی رعنائی
سلام
ضامن و مامن ہماری بخشش کے
سلام
آپ ﷺ کے، کونین میں اجالوں کو
سلام
آپ ﷺ کے در کی فضائے مخمل کو
سلام
شہرِ اخوت کے سب مکینوں کو
سلام
چہرۂ اقدس کی ہر تجلی کو
سلام
شہرِ عقیدت کے سارے بچوں کو
سلام
شہرِ تمنا کی پاک گلیوں کو
سلام
شہرِ محبت کی رہگذاروں کو
سلام
شہرِ شریعت کے پاک دامن کو
سلام
شہرِ منور کی نرم چھاؤں کو
سلام
شہرِ مدینہ کے ہر کبوتر کو
سلام
شہرِ معطر کی خاکِ انور کو
سلام
شہرِ پیمبر ﷺ کی چاند راتوں کو
سلام
شہرِ وفا کے ہر ایک زائر کو
سلام
شہرِ مقدس کے لالہ زاروں کو
سلام
مسجدِ نبوی کے ذرّے ذرّے کو
سلام
آپ ﷺ کی محفل کے چاند تاروں کو
سلام
حضرتِ صدیق رضی اللہ عنہ  کی رفاقت کو
سلام
حضرتِ فاروق رضی اللہ عنہ  کے تدبر کو
سلام
حیدرِ کرار رضی اللہ عنہ  کی شجاعت کو
سلام
حضرتِ حمزہ رضی اللہ عنہ  کی جاں نثاری کو
سلام
دوشِ پیمبر ﷺ کے شہسواروں کو
سلام
آپ ﷺ کے بے لوث جاں نثاروں کو
سلام
میری نگاہوں کی شرمساری کو
سلام
میرا، مواجہے کی اشکباری کو
سلام
چشمِ تصور کے رقصِ بسمل کو
سلام
عاشقِ صادق کی التجاؤں کو
سلام
چشمِ تحیر کے اشکِ پیہم کو
سلام
شہد سے میٹھی کھجور کے پیڑو
سلام
شہرِ محمد ﷺ کے سرمدی لمحو
سلام
ہادیٔ برحق، سلام میرے رسول ﷺ
سلام
مصحفِ قرآں کی بہو بہو تصویر
سلام
مسندِ عظمت کے تاجدارِ کریم
سلام
نقش و نگارِ حیات کے باعث
سلام
سیدِ عالم، سلام ابرِ کرم
سلام
مرکزی انسان بزمِ ہستی کے
سلام
مخزنِ علم و ادب کی تابانی
سلام
آئنہ خانے میں روشنی کے سبب
سلام
وادیٔ امکاں کی زینت و رونق
سلام
سارے زمانوں کے رہبرِ اعظم
سلام
امن کی خیرات بانٹنے والے
سلام
حجلۂ شام و سحر کے پہلے سفیر
سلام
عظمت و رفعت کی انتہا کے چراغ
سلام
حسن و جمالِ و بہارِ ارضِ ہنر
سلام
بعدِ خدا، سب سے محترم ہستی
سلام
آپ ﷺ کی ہر ہر ادا کو ہو آقا ﷺ
سلام
زائرِ طیبہ کی خوش نصیبی پر
سلام
میرا بھی آقا ﷺ قبول ہو جائے