دل کے افق پر اسمِ نبی پر فشاں ہوا- نصابِ غلامی (2019)

دل کے افق پہ اسمِ نبی ﷺ پرفشاں ہوا
میرا قلم، ریاضؔ، مرا ہمزباں ہوا

اگنے لگی تھیں خوف کی فصلیں جو چار سو
بنجر زمیں پہ ابرِ کرم مہرباں ہوا

بابِ دعا کھُلا سرِ محرابِ آرزو
بختِ رسا پہ عرشِ بریں کا گماں ہوا

عطرِ حنا میں ڈوب کر ابھرا مرا سخن
سر پر سحابِ نور کا پھر سائباں ہوا

اظہارِ عجز کر دیا لفظوں نے آج بھی
اشکِ رواں کا سیل مرا ترجماں ہوا

طوفاں بپھر رہے ہیں مگر موجِ آبِ سرد!
اُس ناخدا ﷺ کا نام اگر بادباں ہوا؟

اوجِ نقوشِ پائے محمد ﷺ کا ذکر کیا
نقشِ غلامِ سرورِ دیں جاوداں ہوا

اے آفتابِ رشد و ہدایت ﷺ ، کرم کرم
مجھ پر بھی اب ضمیر کا چہرہ عیاں ہوا

مجھ سا گناہ گار، سیہ کار آدمی
وقفِ ثنائے مالکِ کون و مکاں ہوا

اب آرزو ریاضؔ کروں بھی تو کیا کروں
صد شکر میں غلامِ شہِ مرسلاں ﷺ ہوا