رقصاں ہے موجِ نور دل و جاں میں رات دن- نصابِ غلامی (2019)

رقصاں ہے موجِ نور دل و جاں میں رات دن
کھلتے ہیں زر کے پھول بھی داماں میں رات دن

ہر شاخ پر گلاب کی رکھتی ہے پتیاں
کس کے لئے بہار گلستاں میں رات دن

کس کے لئے بچھی ہے درِ دل پہ چاندنی
ہوتا ہے کس کا ذکر شبستاں میں رات دن

حرفِ ادب میں لپٹا ہوا اسمِ معتبر
رہتا ہے میرے قلبِ پریشاں میں رات دن

دیکھے بغیر شہرِ نبی ﷺ کے تمام در
کھلتے رہے ہیں چشمِ ثنا خواں میں رات دن

وہ منتہائے ارض و سما، وہ مرے رسول ﷺ
جلوہ نما ہیں شہرِ غریباں میں رات دن

کس کا خیال رکھتا ہے زندہ مجھے ریاض
کس کی چمک ہے دیدۂ حیراں میں رات دن